सक्षम भारत वार्ता
नागपूर, ता. २८ : बंगालच्या उपसागरात निर्माण झालेल्या ‘अन्व’ चक्रीवादळाच्या प्रभावामुळे रेल्वे वाहतुकीवर परिणाम झाला असून, नागपूरला येणाऱ्या चार प्रमुख रेल्वेगाड्या निर्धारित वेळेपेक्षा उशिराने धावत आहेत. प्रवाशांना या विलंबाचा मनस्ताप सहन करावा लागत आहे. दरम्यान, रेल्वे प्रशासनाने प्रवाशांना प्रवासापूर्वी संबंधित गाडीची सद्यस्थिती तपासण्याचे आवाहन केले आहे.
५३ रेल्वेगाड्या रद्द,अनेक गाड्यांचे मार्ग बदलले
चक्रीवादळाच्या पार्श्वभूमीवर प्रवाशांच्या सुरक्षिततेसाठी २७ आणि २८ ऑक्टोबर रोजी एकूण ५३ रेल्वेगाड्या रद्द करण्यात आल्याची माहिती प्रसिद्ध वृत्तानुसार समोर आली आहे. आंध्र प्रदेशातील बापटला आणि विशाखापट्टणम (यानम) परिसरादरम्यान वादळी परिस्थिती निर्माण होण्याची शक्यता असल्याने हा निर्णय घेण्यात आला आहे.
वादळी वाऱ्यांचा वेग ताशी १४० किलोमीटरपर्यंत पोहोचण्याचा अंदाज व्यक्त करण्यात आला होता. त्यामुळे नागपूर-विजयवाडा आणि नागपूर-सिकंदराबाद मार्गावरील रेल्वे वाहतुकीवरही परिणाम होण्याची शक्यता आहे.
नागपूरला येणाऱ्या गाड्यांना उशीर
उपलब्ध माहितीनुसार, मंगळवारी नागपूर स्थानकावर येणाऱ्या काही गाड्यांच्या वेळापत्रकावर परिणाम झाला. यामध्ये पुढील गाड्यांचा समावेश आहे.
- गाडी क्रमांक २२८४६ हटिया–पुणे एक्स्प्रेस: सुमारे ५ तास १५ मिनिटे विलंब.
- गाडी क्रमांक १८०३० शालीमार–लोकमान्य टिळक टर्मिनस एक्स्प्रेस: सुमारे ५ तास १५ मिनिटे विलंब.
- गाडी क्रमांक १२८१० हावडा–मुंबई मेल: सुमारे ५ तास ३० मिनिटे विलंब.
- गाडी क्रमांक १२२३० आजाद हिंद एक्स्प्रेस: सुमारे ६ तास ३५ मिनिटे विलंब.
या विलंबामुळे प्रवाशांचे नियोजन कोलमडले असून, स्थानकांवर प्रवाशांना प्रतीक्षा करावी लागत आहे.
प्रवाशांना सतर्क राहण्याचे आवाहन
चक्रीवादळाचा संभाव्य धोका लक्षात घेऊन रेल्वे प्रशासनाने सुरक्षिततेला प्राधान्य देत काही गाड्यांचा वेग कमी केला आहे. हवामानातील प्रतिकूल परिस्थितीमुळे रेल्वे वाहतुकीत आणखी बदल होऊ शकतात.
त्यामुळे प्रवाशांनी घरातून निघण्यापूर्वी संबंधित रेल्वेगाडीची सद्यस्थिती, अपेक्षित आगमनाची वेळ आणि रद्द झालेल्या गाड्यांची माहिती अधिकृत रेल्वे संकेतस्थळ किंवा NTES ॲपवर तपासावी, असे आवाहन करण्यात येत आहे.
Author: श्रीकांत शहारे
पत्रकार
