सक्षम भारत वार्ता
मुंबई,ता.१७ : रोजी बीड रेल्वे स्थानकावरून बीड – पुणे उद्घाटनपर विशेष गाडीला श्रीमती सुनेत्रा पवार, उपमुख्यमंत्री, महाराष्ट्र राज्य आणि श्री बजरंग सोनवणे, खासदार यांनी हिरवा झेंडा दाखवून रवाना केले. यावेळी आमदार संदीप क्षीरसागर, श्री सुरेश धस, श्री प्रकाश सोळंके, श्री विजयसिंह पंडित आणि श्रीमती प्रेमलता पारवे, नगराध्यक्षा, बीड यांची प्रमुख उपस्थिती होती. हा कार्यक्रम ‘मराठवाडा मुक्ती संग्राम दिना’च्या दिवशीच आयोजित करण्यात आला होता. दिनांक १७ सप्टेंबर १९४८ रोजी भारतीय सशस्त्र दलांनी हैदराबादच्या निजामाचा पराभव करून मराठवाड्याचे भारतीय संघराज्यात विलीनीकरण केले होते, त्या ऐतिहासिक घटनेची आठवण म्हणून हा दिवस साजरा केला जातो. याप्रसंगी बोलताना महाराष्ट्र राज्याच्या माननीय उपमुख्यमंत्री श्रीमती सुनेत्रा पवार म्हणाल्या की, बीड आणि पुणे दरम्यानची ही सेवा मराठवाड्याला महाराष्ट्राच्या पश्चिम भागाशी अत्यंत आवश्यक संपर्क प्रदान करेल, ज्यामुळे या भागात मोठा बदल आणि सामाजिक-आर्थिक विकास घडून येईल.तत्पूर्वी, श्री राजेश कुमार वर्मा, विभागीय रेल्वे व्यवस्थापक, पुणे विभाग यांनी मान्यवरांचा सत्कार केला आणि स्वागतपर भाषण केले. या कार्यक्रमास श्री विवेक जॉन्सन, जिल्हाधिकारी, बीड तसेच मध्य रेल्वे आणि पुणे विभागाचे वरिष्ठ अधिकारी उपस्थित होते. ‘अहिल्यानगर – बीड – परळी वैजनाथ नवीन रेल्वे मार्ग प्रकल्पा’अंतर्गत ‘अहिल्यानगर – बीड’ या विभागाचे काम पूर्ण झाल्यानंतर सुरू झालेली ही गाडी एक महत्त्वपूर्ण टप्पा ठरली आहे.ही सेवा नियमितपणे ‘गाडी क्रमांक 11433/11434 पुणे – बीड – पुणे दैनंदिन एक्सप्रेस’ म्हणून चालवली जाईल. सेवा सुरू होण्याची तारीख, सविस्तर वेळापत्रक, थांबे आणि डब्यांची संरचना याबद्दलची माहिती लवकरच जाहीर केली जाईल. मध्य रेल्वे मराठवाडा भागातील रेल्वे संपर्क व्यवस्था बळकट करण्यासाठी आणि प्रवाशांना सुरक्षित, आरामदायक व परवडणारा प्रवास उपलब्ध करून देण्यासाठी कटिबद्ध आहे. बीड आणि पुणे दरम्यान सुरू करण्यात आलेली ही नवीन सेवा या दिशेने एक महत्त्वपूर्ण पाऊल आहे. यामुळे मराठवाडा – पुणे पट्ट्यातील सामाजिक-आर्थिक विकासाला अधिक चालना मिळेल आणि त्याचबरोबर महाराष्ट्रातील जनतेच्या अपेक्षांची पूर्तता होईल.
Author: श्रीकांत शहारे
पत्रकार
